أبدى عماد النحاس، المدير الفني للنادي الأهلي، سعادته بالفوز الذي حققه الفريق على حساب نظيره سيراميكا كليوباترا، بنتيجة هدف نظيف، في اللقاء الذي جمعهما بالجولة السابعة من مسابقة دوري NILE للمحترفين، على ملعب ستاد القاهرة الدولي.
وعن عدم اقتناعه بالمهاجم السلوفيني جراديشار، رد «النحاس» قائلا: «مفيش حاجة اسمها عدم قناعة بقدرات جراديشار، بنتكلم على لاعب محترف، لو مفيش قناعة مش هيكون موجود معانا، معندناش حد مش مقنع في الفريق».
وتحدث المدير الفني، عن الإصابات الكثيرة بالفريق، قائلا: «ده شغل الجهاز الطبي، بس ممكن يكون الجهد المبذول أكبر، وإصابة بيكهام بسيطة، ومحمد علي بن رمضان اشتكى، لكن كمل لنهاية المباراة».
عماد النحاس: لن نشعر بالغيابات
وأضاف: «لدينا لاعبين نقدر نكمل بيهم، وان شاء الله مش هنحس بالغيابات دي، لا أتحدث عن الحكام، وتحدثت من قبل، لكن كان ممكن يكون فيها قرار أو لا، في حكم في الملعب، وفي تقنية فيديو، لو ده مشفش التاني يشوف، محدش وقتها كان عارف الحكم بيراجع كرة مين، لكن في النهاية لم يحتسب أي شيء،، الحكمين لم يحكموا أي مباراة للأهلي، هل من الممكن أن يكون ده نهج لتجهيز الحكام؟».
وأشار عماد النحاس، إلى أن «تريزيجيه في أزمته كان عايز يطلع يتكلم، لكن النادي رد، هو لاعب كبير قدم مباراة جيدة النهاردة، واستغلينا التفاهم بينه وبين بن شرقي، وتحدثت مع وليد صلاح الدين على الكرة، لكن إشارته لم يكن مقصود بها الجماهير، والنهاردة قدر يقول إنه يقدر يشيل مسؤولية الفريق».
وعن تغيير تريزيجيه؟، أوضح: «خروجه مع وجود ديانج كنا محتاجين قوة في وسط الملعب دفاعيا، وكان لدينا فرص بعدها مثل كرة ديانج وجراديشار، الجيم كان محتاج يفضل مقفول، وبدأ يبان التعب، كنا محتاجين المكسب والتقدم بهدف واحد، وحريصون على ثبات الأداء».
وشدد عماد النحاس، على أن جماهير الأهلي هي الداعم الأول للفريق.
